Þar sem rómantíkin er fjarverandi í lífi mínu þessa dagana er ég búin að gleðjast ótrúlega mikið yfir því að uppáhaldssöguhetjurnar mínar í Alias hafi loksins náð saman Það gerðist reyndar fyrir löngu en ég er búin að skemmta mér yfir annarri séríunni undanfarna daga og verið með fiðrildi í maganum fyrir þeirra hönd Pathetic? Já, held það bara

Annars var ég í tíma áðan og komst að dálitlu, sem fær mig næstum (bara næstum samt) til að taka meðvitaða ákvörðun um að gerast piparjónka. Vissuði að giftir karlar lifa mun lengur en ógiftir? Gott mál. En vissuði að giftar konu lifa töluvert styttra en ógiftar? Af hverju haldið þið að þetta stafi? Ég hef mínar hugmyndir

Hélt fyrirlestur í tuttugu mínútur í morgun ásamt hópnum mínum í skólanum. Ég var með magakrampa, svimatilfinningu og kaldsveitt úr stressi og gat varla haldið á blöðunum mínum. As usual. Svo kom kennarinn til mín eftir tímann og hrósaði mér í hástert fyrir að vera skýrmælt, pollróleg og með góða framsögn. Sagði að ég hefði verið svo pedagógísk í háttum að henni fyndist að ég ætti að hugsa um að leggja fyrir mig kennslu seinna meir. Ég er kamelljón Hef heyrt áður að ég virki hrokafull og snobbuð þegar ég er stressuð, en þetta hljómaði mun betur í dag! Húrra fyrir því.

Heyrði í fyrsta sinn smámælta sænsku í dag. Ég átti svakalega bágt með mig þegar greyið stelpan var að flytja fyrirlesturinn sinn. Essin í sænskunni eru töluvert áberandi og þetta var skelfilegt. Sjuksköterska hljómaði einstaklega skemmtilega úr hennar munni

Vorið er komið með tilheyrandi fuglakvaki og flugnaógeðum. Ætla ekkert að bíða fram í næstu viku með að sækja hjólgarminn, heldur drífa í því núna og smella mér í hjólatúr!

Au revoir!

Eurovision-ég:
Er í agalega miklu stuði þessa dagana. Er ofsalega ánægð með íslenska framlagið og veit að Selma á eftir að standa sig vel sem og þessir þrusuflottu dansarar sem hún tekur með sér! Sænska lagið finnst mér líka afskaplega flott og hann er með fallegri karlmönnum í universum gaurinn sem syngur það Sniðugt að eiga heima i tveimur löndum og eiga þvi tvöfalt meiri séns á góðu gengi

Skóla-ég:
Er ekki í alveg jafnmiklu stuði... Er að fara í próf á fimmtudaginn og það gengur bara ekki neitt að lesa. Einhver páskaleti að hrjá mig. Svo á ég að flytja heillangan fyrirlestur á þriðjudaginn með hópnum mínum og er ekkert að rifna úr spenningi Svo fæ eg bara þriggja daga páskafrí, en þeir þrír dagar verða notaðir vel

Varasalva-ég:
Er í himnaríki þessa dagana eftir að H&M fór að framleiða varasalva með uppáhaldslyktunum mínum

Tónlistar-ég:
Er loksins búin að komast yfir Fisherman´s woman með Emiliönu Torrini og þessi diskur er hrein og tær snilld. Tekur við af Eivöru, sem er búin að halda mér selskap síðan á jólunum Auk þess eru Genious loves company með Ray Charles sem og nýji diskurinn hans Michael Buble alveg að gera sig!

Afmælis-ég:
Er alveg að verða búin að fá ógeð á kökum og brauðréttum. Síðasta kökusneiðin kláraðist í morgun og það er vel Langar líka að þakka fyrir allar kveðjur og gjafir og heimsóknir, ég atti fínansta afmælisdag!

Bóka-ég:
Er búin að svindla og kaupa mér eina bók á bókamarkaðinum hérna :/ Keypti mér ótrúlega flottan Atlas, sem er eiginlega meira svona alfræðirit um landafræði og menningu. Kostaði einungis 2000 krónur, sem er hlægilegt

Bakveika-ég:
Er að bilast. Hef aldrei verið jafnslæm og núna, get ekki setið við skrifborð og ligg því uppi í rúmi að reyna að glósa. Miður skemmtilegt, en þá er bara að fara í Pollýönuleik og þakka fyrir að maður er ekki með alvarlegri sjúkdóma, eins og nýju Ebóluna í Angóla. *hrollur*

Annars eru ég og hinir persónuleikarnir bara í ágætis fíling. Ég er að reyna að gleyma því að ég sé með heimþrá og það gengur betur og betur Heyri líka oft í fólkinu mínu og fékk meðal annars mjög skemmtilegar fréttir frá New York í vikunni Vorið er að koma og það er afskaplega fallegt veður þessa dagana, ennþá skítakuldi en sól og stillt. Ætli hjólið verði ekki tekið úr geymslunni í næstu viku

...þegar hann á sambýliskonur?!
Haldiði ekki að ég hafi bara verið vakin með afmælissöng og morgunmat í rúmið í morgun Góð byrjun á afmælisdeginum þótt ég sakni nú afmælisknúss frá mínum nánustu :/ Þau bæta mér það bara upp í vor!!
Svo vil ég bara bæta því við að Skype er snilld Talaði við Ástralíu og Ísland í klukkutíma í morgun og trúi því varla hvað þetta virkar vel!!

Skrifaði heillanga færslu í gær en hún er horfin! Oh well, reyni bara aftur
Er búin að vera að velta því fyrir mér að hætta þessu bloggi bara, ég er eiginlega alveg hætt að nenna þessu og bara að blogga því ég er með samviskubit yfir að gera það ekki!!
Er frekar pirruð núna. Ætti með réttu að vera uppi á spítala í hálfgerðri skoðunarferð uppi á barnadeild en sit í staðinn heima. Ákvað nefnilega að vera bara á réttum tíma svona einu sinni, ekki hálftíma á undan áætlun eins og venjulega, og taka síðasta mögulega strætó, sem var samt ekkert tæpur Rölti út í strætóskýli og beið og beið en það kom enginn strætó. Næsti átti svo ekki að koma fyrr en 10 mínútum eftir að húllumhæjið byrjaði og ég nenni ómögulega að fara að leita út um allan spítala að hópnum mínum svo ég fór bara heim. Ég sem var svo spennt :/ Fæ kannski bara að kíkja þangað seinna...
Sambýlingur minn hún Anna-Karin átti afmæli í gær og hér var alvöru afmælisveisla í gærkvöldi. Eldhúsborðið var hlaðið fínum tertum og alls kyns gúmmúlaði og ég hlakkaði til allan daginn að fá að smakka. Oj bara. Kökurnar voru allar agalega flottar en svo voru þær bara vondar (eins og reyndar allt sem þessar grænmetisætuvinkonur mínar elda!!). Þær nota t.d. ekki venjulega mjólk heldur einhverja haframjólk og þar fram eftir götunum. Ef þú ætlar að baka köku, bakaðu þá almennilega köku! Sýni þeim á þriðjudaginn hvernig á að gera þetta
Skál í boðinu

Ég þjáist af aldurstengdri tilvistarkreppu & svakalegri heimþrá þessa dagana. Það er ekki skemmtileg blanda!
Auk þess er þessi kúrs í skólanum alveg stórfurðulegur og leiðinlegur, í dag var ég til dæmis í lögfræðifyrirlestri. Ekki alveg það skemmtilegasta og sérstaklega ekki í svona agalega akkurat samfélagi og Svíþjóð
Sem betur fer er föstudagur og ég er lögst með tærnar upp í loft og kellingablað í hönd og ætla að reyna að bæta lundina

Úff hvað það er kalt! Ég ætti kannski ekki að vera að kvarta, hérna eru rúmlega mínus 10 gráður og vindur en ég var að lesa á netinu að hin ýmsu kuldamet voru slegin í Sverige í dag og m.a. mínus 30 gráður í mið-Svíþjóð :/ Kuldaskræfan er ekki alveg að meika þetta, en ég reyni að harka af mér og fer í sturtu á tveggja tíma fresti
Keypti mér skemmtilegan háralit í gær. Dökkbrúnn grunnlitur og svo var strípuefni með í pakkanum Fékk gellurnar hérna til að hjálpa mér og núna er ég með ýkt flottar gylltar strípur! Fór svo í dag í laaaangþráða klippingu og er ansi mikið stutthærð... Veit ekki alveg hvernig mér finnst það en það er alltaf þægilegt að vera með stutt hár!
Á morgun er lærdómsdagur á Sturegatan. Ætla að massa leiðindanámsefnið um öldrun og dauða og byrja á fyrirlestri sem á að vera tilbúinn 22. mars, 2 dögum fyrir próf í kúrsinum...
Svo er á planinu að hitta stelpurnar og borða koku annað kvöld. Á laugardaginn er svo eitthvað svakaafmælispartý hjá sambýlingum mínum og allt of mörgum boðið í stóru íbúðina Sem "betur fer" er ég búin að melda mig á Íslendingagame þá líka og vona bara að það verði ekki búið að kveikja í kofanum þegar ég kem heim!
Ég var svo dugleg í morgun og tók herbergið mitt algjörlega í gegn. Þá meina ég skúffur og allt og meira að segja fataherbergið, sem er ansi hentugt þegar það koma óvæntir gestir, bara henda draslinu inn og loka

Hitti Jón Ágúst og Össa á msn áðan og held barasta að ég hafi ekki talað við þá í svona 5 ár Lét Össa svo lofa að skreppa í helgarvisit frá Árósum og nú er bara að vona að kallinn standi við loforðið!

Nú byrjar sjónvarpsmaraþon kvöldsins með þriðja þættinum af Lost svo ég verð að þjóta